Lunglei; 26th October, 2023: Mizoram Secular Alliance hruaitute chuan vawiin khan Congress Bhavan Lungleiah thuthar thehdarhtute kawmin Kristian sakhua leh Mizo hnam tana thalo BJP do a ngai, an ti.
He hunah hian Pu John Siamkunga MPCC, General Secretary chuan Sakhaw zalenna (Secularism) duhtu chu Congress Party a nih laiin tihbo duhtu chu BJP an ni tiin; hmanni lawka Parliament Special Session-ah M.P te hnena India Constitution chhut thar an semah chuan Secularism leh Socialism tih chu paih a ni tawh a ni, a ti a. Mizoram pawh hi hindu lalram a ni thei tih sawiin, hemi laka kan him theihna tura Mizote kan tanrual angaih em em laia BJP lamtang leh thawhpui mai hrehlo Mizoram atang bawka an awm hi a pawi takzet a ni, a ti.
Pu John Siamkunga chuan, Krista zawn chhuah ram hi hindu kulmuk BJP lak atang hian engtinnge kan him theih ang tih thinlung takin kan ngaihtuah a ngai a, Congress party chuan theihtawpin a dolet zel dawn a ni tiin, Mizo mipuite pawh BJP dolet ngam lamah inlungrual angai a ni, a ti.
P.C Party President Pu Vanlalruata pawhin, BJP leh an sangawi zawnpuite kan danchah angai a ni, a ti.
