24 Dec 2023: Thla 7 a liam hnu-ah pawh sorkar laipui chuan Manipur buaina avanga sahimna zawnga Mizorama raltlante tanpuina sum a la pe lo.
Union Minister of State for External Affairs and Education Dr. Rajkumar Ranjan Singh-a’n tun hnai a Manipur atanga raltlante chhawmdawlna atana Mizoram sorkar hnena Rs vaibelchhe 10 pe tawh anga a sawi chu thu dik lo a nih thu Home Department hotute chuan an sawi a. May ni 23 a khatih laia Chief Minister Pu Zoramthanga’n Manipur atanga Mizorama raltlana awm mekte tanpuina atana sorkar laipui a Rs vaibelchhe 10 a dil chu vawiin thleng hian pek a la nih loh thu Home department hotute’n an sawi. An nitin mamawh, ei leh in tur damdawi leh thil dangte pawh Ministry of Home Affairs duhdan angin hriattir daih tawh a ni a. Pek chu sawi loh engmah chhanna pawh an la dawng lo niin an sawi a. Manipur atanga Mizorama rawn lutte hian harsatna an tawk chho mek zel ni a sawiin Mizoram sorkarin Rs vaibelchhe 5 a pek leh vehbur khawn atanga Rs nuai 81 vel an hmuh hmangin enkawl hram hram an nih thu an sawi a ni.
Tun dinhmunah Manipur atanga rawn raltlante hi mi 11,319 an awm mek a. An zinga mi 2,162-te chu relief camp-ah awmin mi 9,158 te erawh chuan an chhungte leh thiante belin a then chuan mi in an luah hawh a ni.
Hetih lai Mizoramah Myanmar raltlan mi 31,973 an awm mek niin Police department chuan an chhinchhiah a. Champhai district-ah awm tam berin mi 12,484 an awm a, Lawngtlai district-in dawtin mi 5,959 an awm a, Siaha district-ah 5,916 an awm bawk. Saitual district-ah tlem berin mi 75 an awm a ni.
Bangladesh atanga raltlan lo lut hi tun dinhmunah mi 1,128 an awm mek a. An zinga mi 1,112 hi relief camp-ah khawsa in mi 16-te chu relief camp pawnah an awm a ni. (AIR Aizawl)
