Special Assembly koa Forest Conservation (Amendment) Act 2023 ngaihtuah ṭha leh turin sorkar an ngen

04 Sept 2025: Zo Re-Unification Organisation (ZORO) hruaitute chuan Mizoram State Legislative Assembly-in Mizorama hman tura Forest Conservation (Amendment) Act 2023 a pawm (adopt) chu Zofate pawi sawina lian tak leh harsatna nasa tak thlen thei a nih thu an sawi a; Special Assembly koa ngaihtuah ṭha leh tura sorkar ngenin, sorkarin a ngaihtuah ṭha lo a nih chuan a tawp thlenga hmalak an tum thu an sawi.

ZORO hruaitute hian vawiin khan Aizawl Press Club-a thuthar thehdarhtute an kawmnaah ZORO Vice President Pu L.Ramdinliana Renthlei chuan, FCAA hi Supreme Court pawhin a ngaihtuah lai mek a ni a, Court pawhin thuthlukna a la siam theih loh lai leh line of control pawh an la sawifiah theih loh laia Mizoram sorkarin a lo pawm ngawt hi a fel lo hle a, ṭhangthar lo awm zel turte hmakhua a tichhe thei dawn a, he thil hi Zofate pawi sawina lian tak a ni, a ti.

Pu L.Ramdinliana Renthlei chuan Mizoram leh hnam tan a him lo nia an hriat avangin Forest Conservation (Amendment) Act, 2023 chu an pawm theilo a ti a, Mizoram Sorkar chuan Central beng a thlen hma ngeia ngaihtuah ṭha leh se an duh thu leh, a ṭul anga Special Assembly pawh koa ennawn leh turin Mizoram Sorkar an ngen a, Mizoram Sorkarin a ngaihtuah ṭha lo a níh chuan ZORO chuan a tawp thlengin hma a la zel dawn tih a sawi bawk. (AIR)