Aizawl Lal In kum 100 tlin lawm

Aizawl Lal In kum 100 tlin lawm

20 Nov 2026: Vawiin khan Aizawl Lal Pu Makthanga Khiangte leh Pu Hrawva Khiangte te lo chen tawhna hmun- Aizawl Lal In kum 100 tlin lawmna hun chu Aizawl Lal In tual, tuna Lal Hrawva Khiangte fapa Pu K. Liantlinga chenna in, Venghluiah hman a ni a. He hunah hian Lal Makthanga Khiangte, Hrawva Khiangte leh an tu leh fate thlan lungdawh 33 chei that chu pho chhuah nghal niin, ‘Hrawva: Father of Mizo Poetry Enlarged Edition’ lehkhabu bihchianna (Book review) leh Aizawl Lal bungraw thenkhat Mizoram State Museum hnena hlanna hun hman a ni bawk.

Lal Makthanga Khiangte leh Lal Hrawva Khiangte tu leh fa ten Mizoram State Museum hnena an thil hlan te chu Art & Culture Department aiawhin Art & Culture Department Secretary Pi Zodingpuii’n a dawng a. Pi Zodingpuii chuan lawmthu sawiin, kan hnam thil hlui ropui tak takte humhalh nan leh Mizo hnam ziarang leh thil hlu tak tak pi leh pute atanga kan rochunte chu chhuan lo la awm zel turte tana kan venhim theih nan, thil hlui, pi leh pute sulhnu, hnamzia tichiang thei thil engpawh kawl kan awm chuan, humhima venhim reng a nh theihnan Art & Culture Department hnenah ui lova thawh turin sawmna a siam a, hei hian Mizo hnamzia leh sulhnu ropui tak takte chhinchhiah, humhalh leh chawisan kawnga kan thawhhonaah nasa takin min pui dawn a ni a ti bawk.

Lal Makthanga Khiangte leh Lal Hrawva Khiangte tu leh faten Mizoram State Museum hnena an thil hlan te chu hengte hi a ni:
1.Hrawva Khiangte leh Lalluii lem ziak.
2.Rorelna Lalthuthleng set.
3.No mawi – (C.G.G Helme, Superintendent of Lushai Hills in October ni 6, 1931- a Aizawl Lal Makthanga Khiangte a lalna leh an inthianthatna avanga a pek)
4.No mawi dahna dawhkan.
5.Ralleng lim (Ralleng lim hi Dr Phizo Naga in kum 1944-1945 chhunga Indian Independence Movement laiin Lal Hrawva Khiangte chu thawh ho puiah a sawm a, chumi a an inthianthat nana a pek chu a ni)
6. Mizo Zirlai Pawl in an kum 90 tlin lawmnan Lal Hrawva Khiangte hnena memento an hlan.

Centenary lawmna hun hi Pu V.L. Hruaizela Khiangte in kaihruaiin, Pu K. Liantlinga’n Aizawl Lal  Pu Makthanga Khiangte leh Pu Hrawva Khiangte te chhungkua leh an thlahte chanchin tawi a sawi a, Dr. F  Lalzuithanga’n lehkhabu bihchianna hun a hmang bawk. Professor Zodinpuia Pachuau-in lawmthu sawiin he hun hi a khar a ni.

Centenery Lawmna inkhawmah hian Lal Makthanga Khiangte leh Lal Hrawva Khiangte tu leh fate, Lal Khawnbawl 10-te bakah mi thahnem tak an tel a ni. (DIPR)

Share Post:

Comments (0)

No comments yet. Be the first to comment!

Leave a Comment

Boost Your Business with Cutting-Edge Marketing Solutions Today

Your ad here
Image