“Tlawmngaihna mei a mih loh nân a châng chuan mahni intuah hial a tul thin” – Pre. YMA Sub Hqrs Lunglei
18 April 2024: Vawiin khan YMA Bualte Branch chuan an din champhaphak kum 50-na Golden Jubilee an lawm.
YMA Sub Hqrs Lunglei President Pu K.Lalfakzuala chu he Golden Jubilee lawmnaah hian khuallian niin,Golden Jubilee lungphun a hawng. Pu C.Vanlalhmuaka, President Zobawk Group YMA chu khualzahawm a ni. Pu R.Vanlalmuana SEC, Pu H.Lalnunpuia SEC leh zaithiam Feli Hauhnar-te’n Golden Jubilee lawmna hi an hmanpui a ni.
Khuallian, Pu K.Lalfakzuala chuan, YMA-te’n kan hun theuhah khawtlang nun siamthatna hna kan thawk thin a, Zo nun ze mawi kan inzirtir reng a, sual buan tham tak kan nei vek bawk thin. Tlawmngaihna mei a mih loh nân chhawm nun that reng a ngai thin a, a châng phei chuan mahni intuah hial a tul thin; chutianga lo thawktu zawng zawng, kum 50 chhûnga Bualte Branch YMA hruaitu leh member-te chibai ka buk che u, a ti.
Pu K Lalfakzuala chuan, Rangkachak tak tak hian meia fiah paltlang a dâwl a, chu chuan rangkachak tak a lantir zawk hial thin. Chutiang chiah chuan, Zoram thalaite hian zû leh ruihhlo meipui te, mipat-hmeichhiatna meipui te, mipat-mipatna meipui te, hmeichhiat-hmeichhiatna meipui te, thatchhiatna meipui te leh hlemhlêtna meipui hmangtein fiahna kan paltlang mek a, thalai tam leh YMA member tam takin fiahna hi an paltlang zo lo!
Nu leh Pa ten an thisen zâm lang khawpin, biangkî râtin hnâ an thawk a, an hah a an châwl thin. Hetihlai hian thalai tam tak an hman êm êm a, hah a hmâin an châwl a, an duh chen chen an mu a. Hetiang reng kan nih chuan kan ram leh kan khawtlang hi kan ngaihtuahawm lutuk dawn e. Pawi râlin Khawnglung tlangvâlte, “Thawh in hai e” tia thing têla an vawm tho a an kap hlum zêl ang mai khan, kan bul vêla hnamdangte hian kan thalaite hi an kai tho palh ang tih hi a hlauhawm ta.
Hetiang kârah hian Golden Jubilee lawm mêk Bualte Branch YMA te hian fiahna paltlang i zo ila, mi tak tak kan nihzia hêng fiahna kârah hian i lantir ang u, chu chu kan Golden Jubilee hlawhtlinna tur a ni, a ti. YMA Bualte Branch hi April ni 18, 1974 khan din tan a ni a. Tunah hian member 199 an awm mek a ni.
