Tlawng Fest Organising Committee Lunglei hruaitute’n nimin chawhnu khan Lunglei Press Club-ah thuthar thehdarhtute kawmin Lungleiah October thla hian Tlawng Fest buatsaih a ni dawn tih an sawi.
Thuthar thehdarhtute an kawmnaah hian an Chairman Pu Donny Lalruatsanga, Addl. D.C Lunglei chuan Lungleiah intihhlimna liantham a awm khat em avanga thalaite tan intihhlimna hun ropui tak buatsaih an tum tih sawiin, a buatsaihtu turte chu miropui takte nilo mahse hlawhtling tak leh ropui taka buatsaih theih an inring tih a sawi.
Pu Donny-a chuan Tlawng Fest chu October ni 13 leh 14, 2023-ah Tlawng Lui hnar awmna Zobawkah buatsaih an tum tih sawiin, Tlawng Fest buatsaih nan hian Mizoram Tourism Department leh State Sport Council-te’n sum pui an tum sak dawn thu leh Main Sponsors an ni dawn tih sawiin, hei bakah hian Sawrkar Department thenkhat, NHIDCL leh MLA te atangin sum engemawzat hmuh a ni bawk a ti. Tlawng Fest chu Lunglei bik tana Mizoram huap Festival kumhlun anih theih nan Sawrkar Programme-ah a luh ve ngei beiseia buatsaih tum anih thu a sawi bawk.
He hunah hian Organising Committee Vice Chairman Pu C.Lalhmingmuana chuan Tlawng Fest buatsaih an tum chhan a sawi a. Mipuiten Tlawng lui pawimawhna an lo hriatna atan te, Tui hna leh ramngaw humhalh pawimawhzia an lo hriat lehzual nan te, Mizo nunphung chawisang a Mizo ziarang chi hrang hrang thangtharte hnena hlan chhawnna remchang anih theih nan te leh thalaite talent hrang hrang phochhuak a thalaite hmasawna tur ngaihtuah nante buatsaih anih thu a sawi a ni.
Tlawng Fest 2023 Lungleia buatsaih turah hian hnam lam chi hrang hrang leh Mizo infiamna te entir anih dawn bakah Mizoram huap zo tur Beat Contest leh Concert ropui tak buatsaih tum a nih thu a sawi bawk. Heng bakah hian Lungleia Designer-te phochhuah nan Ramp Show buatsaih tum niin, Lungleia Model-te bakah Mizoram huapa Model larte an inlan dawn niin Organising Committee te hian an sawi a. Security leh Sanitation lam pawh tha thei ang ber awm tura beisei anih thu an sawi bawk.
