22 Jan 2024: YMA Venglai Branch chuan vawiin khan an din champha vawi/kum 50-na (Golden Jubilee) an lawm a, Lunglei District Bawrhsap Pi Ramdinliani’n khuallian niin a hmanpui a, YMA Sub-Hqrs Lunglei atangin Vice President Pu CMS Dawngliana leh Secretary Pu Zothanzuala Hnamte-te’n an hmanpui bawk.
Chawhnu dar 12:30-ah Venglai Traffic Point bula siam YMA Venglai Branch Golden Jubilee Lungphun (Monument) chu khuallian hian a hawng a. Hemi hnu Chawhnu dar 1:00 atangin Saikuti Hall-ah Golden Jubilee lawmna inkhawm neih chhunzawm nghal a ni a, YMA Venglai Branch President Pu Malsawmdawngliana’n a kaihruai a ni.
Khuallian Pi Ramdinliani chuan Venglai YMA ten Pathian kaihhruaina changa kum 50 hmel an hmu chu a lawmpui thu a sawi a. Venglai hian a hming a pu zovin hmun laili lai takah a awm a, a lun a, dawh theihte pawh a ngaih chang a awm thin ang tiin, In-pui rilru put pawh a ngai ang, a ti.
Khuallian chuan, YMA chu zirtirtu leh training ground tha tak a ni a, hriattur pawimawh tak tak kan zirna a ni a, puitling tura min chher chhotu a ni a, he pawl hlutzia hi i hre thar ang u, a ti a. YMA chu Team work, team spirit kan zirna a ni tiin sawrkar puibawma sawrkar tha tichaktu ni zel turin YMA-te chu a sawm a ni.
Khuallian Pi Ramdinliani chuan, khua/veng feeling neih nat lutuk a that loh thu sawiin, veng feeling nei na lo turin kalkhawmte a chah a. Ngaihtuahna, rilru leh thlir dan tih zau a ngai a, mahni branch, mahni district tan mai ni lovin kan ram zau zawk tana thawk kan nih hriat a tul thu leh kan ram ti hming thatu kan nih chuan kan veng, kan branch kan ti hmingtha a ni, a ti.
Khuallian Pi Ramdinliani chuan Jubilee pual Souvenir a tlangzarh bawk a ni.
Pu Zothanzuala Hnamte, YMA Sub-Hqrs Secretary pawhin Venglai YMA hruaitu lo ni tawh leh ni mekte chibai bukin, khawpui chhung branch zinga Golden Jubilee lawm hmasa an ni chu a lawmpui thu a sawi a. Hnamdangte sumdawnpuia dawr siam ngai lo turin Hindi thiam a tul thu leh naupang zirlaite’n Hindi an thiam a tul thu a sawi a. Chimrala awmlohna turin inlungrualna leh intodelh a tul thu a sawi bawk. YMA Sub Hqrs Secretary chuan, Ruihhlo thatlohzia tlangaupui nasat a ngaih thu leh Ruihhlo ngaite tan tawngtai sak thin tur leh a zuartute pawh an inhriat chhuah theih nana tawngtai sak thin turin kalkhawmte a sawm a ni.
He hunah hian Venglai chhunga VC, MHIP leh MUP aiawhte’n thu an sawi a, Hruaitu hmasate chawimawina neih a ni bawk.
Venglai Branch YMA hi kum 1974, January ni 21-khan din a ni a, tun dinhmunah member 1400 awmin, mipa 900 leh hmeichhia 500 an ni. Jubilee pual hian tlailamah khawtlang huapin ruai theh a ni.
