ATL Road siam hmasawnna awm loh chhan SLT Company General Manager zawtfiah

31 Oct 2026: Lunglei District Youth Congress Committee (LDYCC) chuan ATL Road siam mekah Thenzawl piah Lunglei lam chin kawng siam hnathawh hmasawnna awm lo leh muang lutuk chu a hmunah kalin kawng siamtu; SLT Company General Manager chu an camp-ah an hmu.

LDYCC-in SLT Company General Manager hnenah vawiin thlenga kawng siamtu tur hnathawk mumal hmuh tur awm lo leh hnathawh hmasawnna awm lo lutuk chu a chhan an zawt fiah a, Company lam chuan hnathawktu labour tam zawk chu puja chawlh hmanga an haw thu leh tunah mi 80 chuang an lo let leh tawh a, boulder lung pawh trip 9 kawngah a thang mek thu sawiin, karlehah hnathawh ṭan an tum thu an sawi bakah kawng siam hi April 2027 hmaa thawh zawh an tum thu LDYCC hotute a hrilh.

LDYCC President Pu Moses Lalrinchhana Chinzah chuan “Kawng chu mipuiin nitin chhan hrang hrang avanga an zawh leh zin veivakte’n kawng chhe lutuk avanga harsatna hrang hrang an tawh ṭhin bakah, fur ruah tui tlak pawh ṭum hnih zet he kawng siam hian a paltlang tawh avangin, mipuiten harsatna an tawh loh nan leh chhuanlam siam lova a rang thei ang bera hnathawk turin Company hotute a hrilh a, fur ruah tui a tlak lohna pawh thla a liam tawh hnuah vawiin thlenga kawng siam hnathawk hmuh tur mumal an awm lo chu a mak hle a, Lunglei mipui hian company hnen aṭangin eng chhuanlam mah ngaihthlak an duh tawh lova, kawng siam hna hi chhuanlam siam lova ṭan nghal turin an ngen a, harsatna leh buaina chinfel ngai an neih chuan Congress ṭhalaiin chinfel anih theih nan kawng siam hi kan vil pui reng dawn a, a khat tawkin hnathawh ṭhat leh ṭhat loh hi kan vil zel dawn a ni” a ti.

Sawrkarin chhiah a tih pung a, thil man a sang zela mipuiin chawi tur kan ngah tial tial a, kawngpui siamna tur atan ‘Chhiah a pung a, kawng erawh a chhe em em lawi si’ hian kan chhiah chawi phu tawkin hmasawnna kan hmu lo tih a ti lang chiang hle a, mipuiten kan mamawh em em kawngpui ṭha kan neih theih nan theihtawp chhuah turin LDYCC chuan sawrkar a phut tih an sawi a ni.