01 Jan 2024: Vawiin kha kum 2024 ni hmasa ber leh kumthar Ni anih angin Lunglei khawpui chhunga Kohhran hrang hrangte pawhin kumthar lawmna inkhawm urhsun takin an hmang a, kumthar lawmna ruai buatsaih an awm hriat a nilo.
Lunglei khawpui chhunga Kohhran hrang hrangte hian chawhma lamah kumthar lawmna inkhawm neiin, BCM tualchhung kohhran tam zawkah chuan inhlantharna thu inchhang an sawirual bakah Kohhran Zaipawl, Mal zai leh Naupang zaipawlte an zai a, thuchah sawitute chuan kumtharah rilru thar pu a, taksa hrisel zawk nei tur leh thlarau lama intuai thar tura fuihna thuchah an sawi tlangpui.
Inkhawm banah Kumthar lawmna thingpui ruai an buatsaih deuh vek a, chawhnu lamah zaikhawmin hun an hmanga naktuk hian kumthar lawmna ruai buatsaih an tum tlangpui a ni.
Hetihlai hian nizan kumhlui thlah zan khan Lunglei khawpuiah pawh sawrkarin a khap chungin kumhlui thlahna leh kumthar lawmna halpuah leh halmawi hal thawm a nasa hle a, kum dang zawng aiin a nasa hial zawk nia hriat niin, kumhlui thlah lai nizan zanlai dar 12:00 atang zinglam dar 1:00 thlengin halpuah leh halmawi hal thawmin Lunglei khawpui chu a luahkhat a ni.
