Nuai 16 chuang senga siam Golden Jubilee Road hawng

05 Nov 2026: HPC Fund Rs Nuai 16, Sing 1, Sang 5 senga siam, YMA Ramthar Branch Golden Jubilee Road chu tukin dar 9:00 khan HPC Vice Chairman Pu V.Malsawmtluanga’n a hawng.

Pu V.Malsawmtluanga chuan Ramthar Branch YMA-te chu thil ti tak tak an ni tiin, an Golden Jubilee hriatrengna atana an kawng siam pawh tha hle a, a hriat thu a sawi. YMA hruaitute leh Councillor bakah bialtu MLA-te Party hruaitute thahnemngaihna zahawm tak avanga HPC sum atanga Golden Jubilee Road an nei chu a lawmpui thu sawiin tangkai tak leh zahawm taka hman anih ngei a beisei thu a sawi a. HPC atangin  Veng hrang hranga YMA Run a tam thei ang ber sak tum anih thu a sawi bawk.

HPC Fund hi MLA bial hrang hrangah a inzatin sem a ni, HPC Vice Chairman chuan a ti a, hei bakah hian NGO hrang hrang mamawh te, Board-in a ngaih pawimawhah te hman thin a ni a ti. Lunglei khawpui kawng siamthat nan Rs Nuai Sangkhat, Sing 3  dah niin tun thal chhung hian thawh tum a nih thu sawi bawkin, ATL Road pawh hmun thum a bultan tura nawr niin, hnathawktu lam pawhin hmun thuma hna thawh tumin an inbuatsaih mek niin Pu V.Malsawmtluanga chuan a sawi.

HPC Vice Chairman-in tukina Ramthar Branch YMA Golden Jubilee Road a hawn hi Kawngpui pahnih inkar luikawr chunga RCC hmanga siam niin, metre 70 a thui metre khat leh a chanve a zau niin, Chequered tile phah vek a nih bakah Railing siam a ni bawk.

Ramthar Branch YMA hian an Golden Jubilee lawmna pui ber chu November ni 7 hian an bialtu MLA, leh Minister ni bawk Pi Lalrinpuii hovin an hmang dawn a ni.