Silencer ri ring tura siam danglam man khawmte Lunglei Police Station kawtah tichhia
28 Aug 2024: Lunglei SP Pu J.Lalmuankima ruahmanna leh kaihhruainain, Lunglei Traffic Police te chuan two wheeler silencer/exhaust 80 decibel pel leh a ri ring tura siam danglam dapchhuah hna an thawk a, 41 an man. Dan bawhchhiate hi dan anga pawisa chawi tirin, an pawisa chawi tlingkhawm hi dan angin sawrkarah thehluh a ni.
Silencer ri ring tura siam danglam an man khawmte chu vawiin khan Lunglei Police Station kawtah an tichhia a ni.
Lunglei SP-in a sawi danin, “Driving licence nei lo leh helmet khum lo te hi chu anmahni tan bak a pawi lo va, dan ina a phal loh silencer/exhaust ri ring hmangtute hian mipui tan harsatna an thlen thin avangin lirthei neitute hnen atang hian dan ang thlapin silencer/exhaust te hi hrensaka mansak anih hnuah Court-ah under section 503(1) of BNSS anga hmalak chhunzawm turin hlan a ni a, Court thuchhuah angin heng silencer/exhaust te hi tihchhiat anih hnuah thirchhia anga hralhin sawrkarah a hralhna sum thehluh tur a ni” a ti.
Lunglei Traffic Police-te chuan dan phal baka silencer/exhaust ring tak tak hmangtute an zawn chhunzawm zel dawn a, khawpui chhunga an duty bakah NHIDCL-in National Highway an siam zawh tawh chinah lirthei khalhtute leh zin mite an him zawk nan ngawrh lehzuala duty turin hma an la bawk.
Lunglei district huam chhunga lirtheia zin harsatna tawk te chuan Lunglei Police Station Officer-In-Charge (Contact:8974637760) emaw Traffic-In-Charge (Contact:8974637603) te hriattir turin Lunglei SP Pu J.Lalmuankima chuan mipuite a ngen a ni.
